返回列表 新主題
http://hk.apple.nextmedia.com/realtime/sports/20170528/56752229
蘋果日報,28/5/2017

近期憑大台套劇《不懂撒嬌的女人》上位既「游生」袁文傑,噚晚有份做阿仙奴對車路士呢場英格蘭足總盃決賽既嘉賓,拍住潘文迪、鍾志光同「荷蘭叻」一齊講波。開波前「游生」喺Facebook專頁就po咗張相,問大家「我地準備好喇,你地呢?」宣傳下。話晒免費台有英足盃決賽播,唔少球迷都有睇呢場大戰,而向來係阿仙奴「忠粉」既「游生」表現就得到唔少人讚好,覺得佢做足功課又算中肯,反而不嬲鍾意認叻既「叻哥」仲有「鍾仔」同文迪都受到唔少批評。

當中阿叻一句「歐洲淨番兩個,沙維同法比加斯畀到呢啲波。」真係嚇親觀眾,點解?沙維2015年已經由巴塞轉投卡塔爾既艾薩德搵食,西班牙國家隊又退出埋,點會仲喺歐洲見到沙維架,資料out得咁緊要。而鍾仔之後講德國盃都唔係好得去邊,介紹法蘭克福晉級決賽之路時,就將甲組既恩高斯達特講成低組別球隊,雖然人地今季護級失敗要降落乙組啫,但話晒都係2015年升上甲組,同阿叻咁啱既資訊又有停喺2015年,唔通大台既資料搜集,呢兩年冇更新?有網民更加整咗條「叻哥」既足總盃全場個人精華,hashtag咗#燈神 #9upper #謝拉特躺著也中槍 #叻哥唔侵文傑踢波 #鍾仔臨尾仲要串埋叻哥跪地,認真搞鬼。
部分網民留言︰
@游生真心分析,其他果幾件淨係識講邊個好波邊個唔好波
@但每次游生講完都冇乜人理佢咁,不過絕對好過叻哥
@游生現場喺大台講波,表現相當唔錯,資料純熟,仲有見地。
@游生資料夠,仲講左好多阿仙奴隱患,及車仔長處,如係阿仙奴迷,會好有共鳴
@潘文啲講波真系唔合格。其實,袁文傑真系識啵,非常投入。反而佢幾個分析真系好過專業評述。
@袁文傑am730寫足球專欄,係資深球迷,夠貼地有文有路,好過個條爛燈叻多多聲啦
@阿叻真係好煩,廢老都係早d訓啦
@文傑=畢特 另外三個=南華球員
@成班旁述堅嘈,毫無節奏,同一有野想講就狂up
=====================================================================================
一個文傑,夠殺三條同場講波佬



返回列表